អង្គារ ៩ ធ្នូ ២០២៥
រាជធានីភ្នំពេញ ៖ បន្ទាប់ពីយោធាថៃបានបាញ់ប្រហារមកលើកងកម្លាំងកម្ពុជា នៅម៉ោងជាង៥ភ្លឺ ថ្ងៃទី៨ ធ្នូ ឆ្នាំ២០២៥ ក្រសួងអប់រំ ថា គ្រឹះស្ថានសិក្សាបានបិទទ្វារកើនឡើង៤២សាលា នៅស្រុកថ្មពួក ស្រុកស្វាយចេក និងស្រុកអូជ្រៅ ។
យោងតាមរយៈបណ្ដញសង្គម នាព្រឹកថ្ងៃទី៨ ខែធ្នូ ឆ្នាំ២០២៥ ក្រសួងអប់រំ យុវជន និងកីឡា បានឲ្យដឹងថា គ្រឹះស្ថានសិក្សា ដែលបានបិទទ្វារបានកើនឡើងដល់ ៤២សាលា នៅស្រុកថ្មពួក ស្រុកស្វាយចេក និងស្រុកអូជ្រៅ ខេត្តបន្ទាយមានជ័យ ។
ក្រសួងបានលើកឡើងថា សាលារៀននៅតាមព្រំដែនកម្ពុជា-ថៃ ខេត្តឧត្តរមានជ័យ បានផ្អាកដំណើរការភ្លាមៗជាបណ្ដោះអាសន្ន ដោយសារយោធាថៃបានបើកការបាញ់ប្រហារមកលើកងកម្លាំងកម្ពុជា នាព្រឹកថ្ងៃទី៨ ខែធ្នូ ឆ្នាំ២០២៥ ។
បើតាមរូបភាពដែលបង្ហោះលើបណ្តាញសង្គមឃើញសកម្មភាពកុមារតូចៗជាសិស្សានុសិស្សបានរត់ចេញពីបន្ទប់រៀន នៅពេលលឺសម្លេងគ្រា.ប់កាំភ្លើងដែលភាគីថៃបាញ់មក ។ ទិដ្ឋភាពនេះមើលទៅគួរឲ្យអាណិត និងសង្វេក នៅពេលមានសង្គ្រាមធ្វើឲ្យក្មេងៗខាតការរៀនសូត្រ ។
ក្រសួងការពារជាតិ បានបញ្ជាក់ថា នៅព្រឹកថ្ងៃទី៨ ខែធ្នូ ឆ្នាំ២០២៥ ចាប់ពីវេលាម៉ោងប្រមាណ ០៥:០៤នាទី យោធាថៃបានបើកការបាញ់ប្រហារមកលើកងកម្លាំងកម្ពុជា នៅក្នុងតំបន់អានសេះ ខេត្តព្រះវិហារ បន្ទាប់មកបាញ់នៅប្រាសាទតាមាន់ធំ ដោយប្រើប្រាស់រថក្រោះបាញ់ចូលជាច្រើន និងនៅតំបន់ប្រាសាទព្រះវិហារ នៅ៥មករា និងនៅចំការចេក និងការបើកការវាយប្រហារនេះធ្វើឡើងបន្ទាប់ពីយោធាថៃបានធ្វើសកម្មភាពបង្កហេតុជាច្រើនរាប់មិនអស់ច្រើនថ្ងៃមកហើយ ជាពិសេសឧបទ្ទវហេតុកាលពីម្សិលមិញនៅព្រលានថ្ម ក្នុងចេតនាញុះញង់ដើម្បីនាំដល់ការប៉ះទង្គិចគ្នា៕
